#22- "NAMI..."

Aaj is thand ke mausam me bhi ehsaas ye hua...
Seeli hawa aayi to mujhe vishwas ye hua...
Kahi door koi hai jise kisi ki kami hai....
Uske rone se hi in, fizaaon me dekho nami hai...

Hairaan kya hona, maine khud ko kaha...
Is baat par pareshaan kya hona, maine khud ko kaha....
Is bewafai ke daur me, sabhi ko kisi ki kami hai...
Haan, un aansuon se hi in fizaaon me ye nami hai...

Socha ke khidki band karu, shayad ye tham jaaye...
Rukk gaya mai soch, nami sheeshe par na jam jaaye...
Pucha maine rab se, Ye aankhein rone ko to nahi hai...
Kyu fir inke aansuon se, in fizaaon me ye nami hai...

Kisi ko mehsoon na ho sakegi, mujhe ho jaati hai...
Jo baatein kisi ko nahi, vo mujhe chu jaati hai...
Khuda se dua hai Anuj, poori karo jisko jo kami hai...
Sukha do un aankhon ko, jinse, in fizaaon me ye nami hai...
~~AS~~

#21- "Time Flies"

Thoughts initiated by my big brother, Ish Bansal, and converted into this work by me...

There was a time, when wishes were full of feelings...
Today, Facebook and media destroyed, all those feelings...
Now the relations are nothing but lies...
Truly said, time flies, time flies...

Now there is time to explore this world really vast...
Parties, oh!, doesn't matter, life is too fast...
No-one has time for the family ties...
Truly said, time flies, time flies...

I decided to laugh on this world, but stopped...
To think about today's lifestyle, not very prompt...
Believe me, these empty relationships will die...
Truly said, time flies, time flies...

Everyone is here to defeat someone...
No one is here to help someone...
People are now jealous of their brother's rise...
Truly said, time flies, time flies....
~~AS~~

#20- "SHAYARI"

Mausam ke andaaz se milti hai...
Aam Insaan ko, kora kaagaz sa lagti hai...
Jo kuch insaano ke seene me ghar kar jaaye...
Shayari vo hai, jo jawani vapas kar jaaye...

Dilon ke dastoor ko jo pal me bayaan kar de...
Is behre jag ko bhi jo pal me sunta kar de...
Jo saamne laa de dosti, rishte aur kayari...
Zindagi ki vo atoot kadi hai shayari...

Kisi ke liye likho, to paigaam-ae-ishq hai vo...
Lakhon dilo ko chune wali, ek anokhi sargam hai vo...
Jo kalam ki taakat "Anuj" duniya ko dikha de....
Shayari vo hai jo gairon ko, seene se laga de...

Jo is kathor duniya me, rishton ko baandhe hai...
Jo ek insaan ki duaaon ko, shabdon me baandhe hai...
Aur jo prem ka izhaar badi shiddat se kar jaati hai...
Shayari vo hai jo mann me ek soch bhar jaati hai...
~~AS~~

#19- "PITA"

Dedicated to my dad, the best Father in the world....

Aaj pita par sochne baitha to ye aankhein ro di...
Fir likhne ka soch maine kalam syaahi me bhigo di...
Kalam ne kaha, chodo mujhe, pita par mai khud likh lungi...
Sach kehta hu, ye kavita, meri kalam ne swayam hi sanjo di...

Raat din juta kar vo ghar ko chalaatein hai...
Aap bujh jaaye lekin ghar ka chirag jalaatein hai...
Baarish me bheeg kar ghar aane par bhi...
Ek pita hi hai jo mere maathe ko sehlaatein hai...

Ab yaadein bhi dhundli hai meri, mai yaad karu to kya...
Mere pita ne kiya hai itna, mai bayaan karu to kya...
Meri har khwaaish ko is kada poora kiya hai unhone...
Ab raha na kuch maangne ko, rabb, mai tujhse maangu to kya...

Vo din the jab bazaar hum kandhe par jaaya karte the...
Mere pita saath the, hum khud ko mehfooz paaya karte the...
Vo din nahi bhulta jab ek roz soya tha mai baat karte hue sofe par...
Lekin unki badaulat subah khud ko bistar par paaya karte the...

Ab likhta hi rahunga meri bhaawnaon ka koi ant nahi hai...
Ek pita hai jinka parivaar me koi vikalp nahi hai...
Mere pita ne hi zamaane se ladna mujhe hai sikhaaya...
Sach kehta hu, unke bina, mera koi vajood nahi hai....
Koi vajood nahi hai...
~~AS~~

#18 - "JIYO"

Pichli baaton ko bhula, dekho aage...
Kyu rehte ho ateet me, badho aage...
Apne saare gam tum bhula kar jiyo...
Ek hai zindagi isko khul kar jiyo...

Konsa tumhara ateet kabhi vapas aayega...
Bhul kar dekho isey, ye kabhi na sataayega...
Har pal tum ab muskura kar jiyo...
Ek hai zindagi isey sab bhula kar jiyo...

Apne karmo ki chinta karna jaayaz hai...
Zimmedaariyon ki fikr bhi teri jaayaz hai...
Dimag se lekin inka sehem utaar kar jiyo...
Ek hai zindagi isko khul kar jiyo...

Teri ek hasi ko jaane kitne taraste hai...
Har museebat ke hal ko, na jaane kitne raste hai...
Isliye museebaton ko chunauti maan kar jiyo...
Ek hai zindagi isey sab bhula kar jiyo...

Choti choti khushiyon me mann ko sukoon dena sikho...
Rab ne diya hai jo, tasalli kar, shukriya karna sikho...
Ab tum sab chod kar jiyo, sab bhula kar jiyo...
Jiyo to zindagi, sar utha kar jiyo...
Sar utha kar jiyo...
~~AS~~

#17 - "DARD"

Describing the conditions of all those... Who loved someone, but their partner left them...

Ek zamaane ki baat thi jab mai bhi khush tha...
Gungunaate hue panchiyon ka mai dost tha...
Ab chat par unse milne mai nahi jaata...
Kyunki mere dil se unhe khone ka dard nahi jaata...

Vo sochte hai aaj bhi ke mai bewafa hun...
Raat me daraane wala mai ek bura sapna hun...
Kuch majbooriyaan thi meri tabhi na kahi...
Jeena mera zaruri tha tabhi ye kadwi baat kahi...

Ye rabb bhi ab mujh se bahut khafa hai...
Kehte hai ke ye dard sehna meri saza hai...
Aur jinka dard "Anuj" tu has kar sehta raha...
Unhe ehsaas nahi ke tu unke liye kya kya karta raha...

Jee chahta hai raah ke har patthar ko ye dard bayaan karu...
Isko baant kar mai apna mann halka karu...
Lekin mann me ek baat hai jo mujhe hai rokti...
Patthar bhi na ro de ye baat hai tokti...

Ab ant me chaara hai ke zindagi jeeta rahu...
Apni khushi ko mai pal pal pe khota rahu...
Shayad isi raah me khushi se mulakaat ho jaaye...
Nahi to kise pata hai kab zindagi ki shyaam ho jaaye...
~~AS~~

#16 - "AASHAAYEIN"

Ye unke liye, Jo aashayein rakhte hai.. Magar poori nahi hoti...

In aashaon ka mai shikaar hu banta...
Na chahte hue bhi ek mazaak hu banta...
Na jaane kyu fir mai inhe paalta hu...
Door jaaye to in aashaon ko bulata hun...

Har damm zamaana dutkaarta kyu hai..
Koi bataaye ye aashaon ko dubaata kyu hai..
Khud to "Anuj" zamaana kuch karta nahi...
Shayad tabhi in aashaon ki kadar vo karta nahi...

Khair chodo, is dard se mai vaakif hun...
Aashaon ko doobte dekhne ka aadi hun...
Gam nahi hai ke ye doob jaati hai...
Mehnat karta hu, tabhi aashayein aati hai...

Aasha rakhi tabhi mai chal raha hun...
Inhi ke bal pe ye kavita likh raha hun...
Bina aashaon ke pucho tum kahan tak jaoge...
Chaloge to sahi magar raah me atak jaoge...

Ab aasha hai ke ek din meri bhi puch hogi...
"Singhal" ke naam ki ginti samajhdaaron me hogi...
Vo din aayega jab zamaana bhi vichaar karega..
Meri tarah in aashaon ko paala karega...
Shayad paala karega....
~~AS~~

#15- "BADA HO KAR KYA KARU?"

Bade ho kar to koi khud ka bhi saga nahi rehta..

Gairon ke liye to vo zinda bhi nahi hota...

Is duniya me bada ho kar khud ko ganda karu?

Prashna hai mera ke me bada ho kar kya karu?

Hairaan tha me roz ye apraadh dekh kar..

Dukhi tha mai logon ke marte jazbaat dekh kar..

Kya mai bhi apne khyaal is waqt pe kurbaan karu?

Batao mujhe, mai bada ho kar kya karu?

Baccha hi rehne do tum aaj mujhe..

Jeene do zindagi maa ke pavitra aanchal me mujhe..

Kya kal is aanchal ko lut-te dekhne ko rahu?

Jawaab do, mai bada ho kar kya karu?

Meri akeli zindagi is duniya ko na badal payegi..

Hasrat-e-junoon meri bhi bas mar jayegi..

Na chahte hue bhi is duniya me dhalne ko jiyu?

Samjhao mujhe, mai bada ho kar kya karu?

Rajneeti ke mai kaale bazaar ko dekhu...

Safed vastron me maile hote netaon ko dekhu..

Fir ant me mai apna dhan lutaane ko rahu?

Batao na! Mai bada ho kar kya karu?

Totli zubaan me mai maa se behes karta tha...

Unki baat na sunne ka mai dhong karta tha...

Budhaape me unki boli dutkaarne ko jiyu?

Sochta hu aakhir mai bada ho kar kya karu?

Bada ho kar kya karu..........

#14 - "SHIKSHAK"

Me abhi itna bada nahi ke shikshak par kuch keh saku, par ek choti si koshish..:

Naye peedhi ka nirmaan karna jaante hai..

Bacche ko ek acha insaan banana jaante hai..

Maa Baap ke baad aasra hai sabhi ko sirf inka..

Ye vo farishte hai shikshak naam hai jinka..

Samandar bhi kam hai inke gyaan ke aage..

Suno inki, ye kar denge aasmaan se aage..

Aasmaan kam ho to karenge tez roshni se..

Unse jawaab milega har baat ka khushi se..

Tumhare marg ke sabhi taale tod denge..

Tumhari kismat me jeet ko likh denge..

Har damm tumhari bhalaai ke liye hi to jeete hai..

Tumhare bhavishya ke har pal ko vo seete hai..

Chiraag leke dhundo par inse ache dost na milenge..

Jo tumhe har pal prerit kare vo log kam milenge..

Izzat karo inki ye har aashirwaad tumhe de denge..

Tujhe bhi ye "Anuj" ek acha insaan bana denge...

#13- "MAA"

Mere naam ki pehchaan kisi aur karm se nahi hogi...

Jo kuch mene maa par likha hai bas vahi kaafi hogi...

Mere rone par jo khud ro sakta hai..

Ek hi insaan hai jo aisa kar sakta hai...

Apna vo har sukh chod deti hai..

Ek maa hai jo mere sang ro deti hai..

Hazaaron laakhon dost tu chahe bana le..

Is duniya me kitne hi sambandh tu bana le..

Ek hi rishta hai jo hamesha kaayam rahega..

Ek maa shabd hai jo hamesha ujaagar rahega..

Insaan nahi vo ek farishta rab ne hai banaya..

Har damm saath hai mere vo ban kar mera saaya...

Kabhi apne bacchon ko buraaiyon se bachaati hai..

Meri maa mujhe har kumarg se hataati hai..

Kitni bhi gambhir mushkil me fasa hun..

Fir bhi mai maa shabd dil me liye rehta hun..

Ek maa hi to hai jinki me sun leta hu..

Vo hase to me bhi khilkhila deta hu..

Dhanya hai vo jinki maa hai..

Ye samjho ke rabb unke saath hai..

Gareeb se gareeb bhi dhani paata hai khud ko.

Maa saath ho to sukhi paata hai khud ko..

Arey murkh hai vo jo maa ki sewa nahi karte..

Budhaape me unhe vridh aashram me hai chodte..

Ek maa hi hai jisne kabhi tumse kuch nahi maanga..

Usne dua me apni teri khushi ke siwa kuch nahi maanga..

Ek jaanwar bhi maa ke bina sehem jaata hai..

Maa ki yaad me nit aansu bahaata hai..

Aur ek insaan hai jo is pyaar ko samajh nahi paata..

Bhagwaan ke is roop ka mulya jaan nahi paata...

Gehre samudra se nikla ek heera hai maa...

Aaj jo hu.. Mujhe banane wali hai maa...

~AS~

#12 - "MERE JAANE PAR"

Ye jo tumhari nasheeli aankhein hai...

Duniya ke sabhi nazaaron se pare hai...

Tum inko hargiz kabhi namm na karna...

Me chala jau to inhe tum tang na karna...

Satya hai ke jaana ek din sab ne hai...

Un sab me ek naam mera bhi hai...

Aaj nahi to kal mujhe yaad karke rona na...

Apni is khoobsurti ko mere liye khona na...

Apni zulfon ko tum zara aaine me dekho...

Apni latt ko kaan ke piche kar ke dekho...

Me jau to tumhe zulfein failaani nahi hai...

Apni saadgi tumne gawaani nahi hai...

Ye jo tumhari haseen se zindagi hai...

Tumne ise antim saans tak nibhaana hai..

Mere jaane par tum haar gaye, ye na kehna...

Mujhe bhool kar ye zindagi, bas jeete jaana...

~~AS~~

#11 - "DIL"

Dekho aaj is dil ki baaton me mai bhi aa gya...
Ise samajhne ki chah me mera sir chakra gya...

Common sense ab aur bhi uncommon ho gayi...
Is duniya me sahi raah ki kami ho gayi...
Ye dil hi tha jisne sab ko bhatkaya hai...
Ab is duniya me sachi salaah ki kami ho gayi..

Saari duniya is dil ki maari hai...
Iske naadaan ishaaro pe apna dimag haari hai..
Koi nahi samajh paaya hai is dil ki harkaton ko..
Asal me.. ye duniya iski chaal ki maari hai..

Iski pehli chaal "Pyaar" me log andhe ho gaye...
Kisi ke liye khud apno se paraaye ho gaye...
Pyaar khubsurat to bahut hai magar dhyaan rakhio..
Isme ameer se ameer bhi faqeer ho gaye...

Dusri chaal "Aashiqui" me to saare nau-jawaan lage hai..
Ab to is race me jhagde bhi hone lage hai..
Aashiqui me maza to hai magar dhyaan rakhio..
Isse be-izzat hue kaafi log ab marne lage hai...

Aisa nahi ke mene pyaar se ladai ki hai..
Bas shabdon ke saath mene aashiqui ki hai...... 

#10- "MUSKAAN"

Dekh aaj ek naya savera tere saamne hai..
Khushion se bhara kal tere saamne hai..
Bas deri hai to bas tere dhundne ke armaan ki..
Jaldi kar aur khol le jholi muskaan ki...

Apni zulfon ko hata kar is roshni ko dekh..
Is chamakti hui dhoop me tu bhavishya ko dekh..
Tujhme kami hai tu marta hai choti choti baaton pe..
Baahein faila aur mar tu muskaan bhari yaadon pe...

Har pal ko tu khul ke jeena seekh le..
Gamon ko dil se bahar karna seekh le...
Muskaan le kar chal tu apne hothon pe har pal..
Dekh teri raah se hat jayenge ye bura aaj kal

Ek muskaan se tu bahut khushiyaan laa sakta hai..
Khud ke saath kisi aur ka bhi din bana sakta hai..
Koshish to kar ek baar mushkilon me muskuraane ki..
Sochna chod dega tujhe har gam ab daraane ki...

#9- "DHARTI... RO RAHI HAI..."

Hariyaali ke beech kuch unchi imaartein achi lagti hogi...
Tumhe ped kaatne me badi santushti milti hogi..
Bhul gya tha tu tabhi ye din dekh raha hai...
Soch ke dekh ke dharti ko ye harkat kaisi lagti hogi...

Jyo sochega tyo hi tu bhi khud ko kosega...
Bina pedo le kya khaakh jeevan basega..
Teri soch pe development ka taala tha...
Badaulat uski tune dharti ko ujaada tha..

Dekh aaj sama tere saamne hai...
Teri kartooton ka jawaab tere saamne hai...
Sirf ek aansu dharti ne hai abhi bahaya...
Tu ginti kar tere jaise kitno ka hua safaya...

Ab bhi sambhlega nahi tu us taale ke kaaran..
Ujaadega tu usey tere abhimaan ke kaaran...
Do gaz zameen ke liye aaj tu mar hai raha...
Nahi sudhra to dharti tujhe bhi kar degi swahha..
~~AS~~

#8- "PARCHAAI"

Humari mulakat mujh par bhaari pad gayi..
Jism-o-jahan me jaise tabaahi mach gayi..
Koi nuksaan mujhe nahi hua hai sun lo tum..
Galti hui ke is "Anuj" par tumhari PARCHAAI pad gayi..

Tabhi se me is jahaan ko nahi dekhta..
Raat hai ya din.. Ab ye bhi nahi dekhta..
Khushkismat hu ke tumhari PARCHAAI padi mujhpe..
Bas tabhi se aaine me.. mai khud ko nahi dekhta..

Ab aandhi bhi mujhe chahne ko tarasti hai..
Ye tez hawain to mujhe chune ko tarasti hai..
Jab se teri PARCHAAI padi hai mujh par..
Ye saari duniya mujhe haath lagane ko tarasti hai..

Parvaton se paani ab behna ruk gaya..
Dekho, ye samay bhi ab bhaagna ruk gya..
Teri "PARCHAAI" ke daayre me aaya hu jabse..
Meri ek jhalak paane ke liye.. Ye jahaan bhi ruk gaya..
~~AS~~

#7- "TERI MOHABBAT"

Is pal me tumhe sochna seekhna pada..
Jeene ka ek naya tareeka seekhna pada..
Teri mohabbat ne mujhe hasna sikha diya..
Aur kuch nahi to mujhe shayar bana diya...

Tu dekh me bhi ek bhola insaan hi to tha..
Jaisa bhi tha jeene ke liye kaafi hi to tha..
Teri mohabbat ne shaan se jeena sikha diya..
Me insaan tha.. Mujhe farishta bana diya...

Teri ek nazar ke piche me hill gya..
Tujhe apna banane ke liye firr gya..
Teri mohobbat hi to thi jisne hausla dilaya tha..
Is bhole se "Anuj" me ek junoon jagaya tha..

Aaj bahar nikla to sab jaante hai..
Mann hi mann me shehzaada bulaate hai..
Teri mohobbat hi to thi jisne ye naam dila diya..
Singhal se mujhe Mr. Singhal bana diya..
-AS-

#6- "TU AKELE HI"

• 

  
  

  
  

  Mud mud ke na dekh tu is jahaan ko..
  Tu paar kar de tanha hi is sailaab ko...
  Zindagi me choti choti khushion ko paana seekh le...
  Tu akele hi in raahon pe chalna seekh le...

  Yaad rakhio yaadon se buri koi cheez nahi hoti...
  Deti hai ye zakhm aise jinki bharpaai nahi hoti...
  In armaano ko tu kaabu me karna seekh le...
  Tu akele hi mushkilo se ladna seekh le...

  Zamaana tujhe har pal kosa karega..
  Tujhe teri raah se dhakela karega..
  Tu mann me lakshay ko thaanna seekh le..
  Tu akele hi khwaabon ko paana seekh le...

  Anuj shayari dimag se nahi dil se hoti hai...
  Ye duniya ek khuli kitaab hoti hai...
  Apni seema se zyada tu seekhna seekh le..
  Tu akele hi is kitaab ko padhna seekh le...

#5- "ADHOORE"

Adhoore tum ho.. Adhoora me bhi hu..
Adhoora ye sama hai humare bina..
Adhoore ye pal hai.. Adhoora hai ye aanchal..
Adhoora hai ye waqt tumhare bina..

Zindagi me shayad tum yu na haste..
Kul pal agar tumhare adhoore na hote..
Mujhe milne par ye khushi tumhe milti hi na..
Agar adoore na tum hote mere bina..

Adhoore ye bol.. Adhoora ye din hai..
Adhoora hai ye dil tumhare bina..
Adhoori ye zindagi.. Adhoore se hai raaste..
Adhoora hai sab kuch.. Tumhare bina...

#4- "MEHETTV HOTA"

Har subah aashaaon se bhari hoti...
Zindagi me agar gareebi ka mehettv hota...

Har shyaam teri hisaab bhari hoti...
Zindagi me agar teri paison ka mehettv hota..

Aur

Dhundta tu bhi vo haseen pal har jagah..
Zindagi me agar jawani ka mehettv hota..

Doobta tu har din usi yaadon me..
Zindagi me agar dosti ka mehettv hota..

Aur

Un 4 haseen pal ke liye aaj jeeta tu..
Zindagi me agar hasi ka mehettv hota..

Shayad mann hi mann muskuraata tu..
Zindagi me agar yaadon ka mehettv hota..

Aur

Is janam me tu paap karne se darta..
Zindagi me agar swarg ka mehettv hota...

Bevajah.. Begunaaho ko tu hargiz na maarta..
Zindagi me agar teri zindagi ka mehettv hota...

#3- "TO AANA"

Tumhe aashaon se pyaar nahi to jao,
Kismat pe aitbaar nahi to jao..
Mere andar asha dikhe to aana
Tujhe kismat mujhme dikhe to aana...

Gumaan is jawani pe bhi kya karti ho,
Mere hausle ki kadar tum kahan karti ho..
Mujhme agar jazba dikhe to aana,
Ho jawani hausle se jeeni to aana...

Aakhir apno se gila hi tum kyu karti ho,
Chaand me daag ki shikayat tum kyu karti ho..
Mujhe apna samajhti ho to aana,
Is chaand se sundar samajhti ho to aana...

#2- "TERI YAAD"

Is aasmaan me nazar kuch bhi nahi aata,

Chand baadlon ke siva koi heera nazar nahi aata..

Tumhe yaad karte hi heeron ki barsaat ho gayi,

Aasmaan me har or tumhari hasi utpann ho gayi...

Meri is kavita ka koi adhyaaye mujhe nahi dikhta,

Likhne bethu to koi sheershak mujhe nahi milta..

Tumhe yaar karte hi rom-rom mere khil jaate hai,

Ye kalam, ye haath, khud hi sab likh jaate hai...

Aaj kalyug me aashiqui ka sama badal gaya,

Log deewaana kehte hai usey jo kisi ke piche mar gaya..

Ek tum hi to ho...

Ek tum hi to ho jo meri in bhavnaaon ko bakhoobi samajh paayi ho,

Is zamaane me ek raanjha tum heer ban dhund paayi ho...

#1-"TALAASH"

Jo Gam de kar bhi zoron se hasa de,

Jiski tasveer dil ko dheere se sehla de..

Aur jo baste hai meri har saans me,

Kaash vo hi mil sake mujhe meri har talaash me...

Har talaash ki me ek ek kadi un se jod saku,

Unko paane ki koshish me khud ko kho saku..

Jiski ek hasi 'Anuj' tere ang ang me bas sake,

Tu talaash kar uski jiski ruh me tu bas sake...

Jo likhe kuch aisa ke baatein adhuri ho,

Unhi baaton se humari judaai adhuri ho..

Us kanya ko duniya na dhund paayi,

Jo meri is talaash me hai samaayi...

Jinke aage mor bhi naachna bhool jaye,

Jee chahta hai bas unhi ko hum apnaaye..

Kehte hai aisi stri is duniya me nahi hoti,

Hume fir bhi talaash hai unki jo mere bina poori nahi hoti..

Jise dekh kar sharma jaaye ye aaina,

Vo abhi tak meri zindagi me aayi na..

Dua hai ke ye haseen se hasi unke paas rahe hamesha,

Mujhe talaash hai unki jo mere saath rahe hamesha...